Fyrir rétt um áratug hófst kennsla í vöruhönnun, eða þrívíðri hönnun eins og hún var nefnd þá, við Listaháskóla Íslands. Á undraskömmum tíma hefur þessi unga hönnunargrein náð að fanga athygli almennings með þeim aragrúa verkefna og spennandi hluta sem íslenskir vöruhönnuðir hafa gert.

Á sýningunni er leitast við að veita innsýn í vöruhönnun og mótun landslags hennar síðustu ár. Sjónum er sérstaklega beint að samstarfsverkefnum vöruhönnuða. Verkefni þeirra eru oftar en ekki þverfagleg. Þau eru margbreytileg og mikilvæg í mótun landslags vöruhönnunar á Íslandi og um leið fyrir íslenskt samfélag. Inn í þetta samhengi fléttast sögur þeirra hönnuða sem hafa látið að sér kveða fyrr og nú auk þeirra nýju radda yngri kynslóðarinnar sem hafa sprottið fram.

Á sýningunni  eru um  50 verk eftir fjölda íslenskra vöruhönnuða. Að auki eru sagt frá stórum samstarfsverkefnum sem nú standa yfir og eru mikilvæg til eflingar á nýsköpun, endurhugsun á notkun staðbundins hráefnis og leiðum til að endurvekja aðferðir og þróa áfram og efla samfélagið. Í texta sýningarstjóra, Hlínar Helgu Guðlaugsdóttur segir:

,,Saga til næsta bæjar er saga líðandi stundar. Lýsing augnabliks í íslenskri vöruhönnun og innsýn í síðasta áratug, barnæsku fagsins á Íslandi á umbrotatímum. Við skyggnumst inn í hugmyndaheim valdra hönnuða þessa tímabils, samstarf þeirra þvert á greinar og samtal við samfélög. Tilraunir og leit að nýjum leiðum taka á sig ýmsar myndir í umhverfi án hefðbundins iðnaðar og jafnvel markaðar. Við hrífumst af fagurfræði og ljóðrænu yfirborðsins en undir niðri krauma draumar um betri heim og sannfæring um hönnun sem afl til raunverulegra breytinga.

Saga til næsta bæjar, felur í sér ferðalag sem hvergi nærri er lokið.
Sagan getur orðið okkur til hvatningar, mörgum til umhugsunar og flestum til frásagnar."


Nánari upplýsingar um sýninguna á heimasíðu safnsins, www.honnunarsafn.is

Sýningin verður opnuð fimmtudaginn 7. júní kl. 17 og mun standa fram í október. Fræðsludagskrá með leiðsögnum og samtali hönnuða um verk þeirra verður auglýst sérstaklega.

Eftirtaldir hönnuðir og hópar eiga verk á sýningunni eða koma fram í viðtölum:
Katrín Ólína Pétursdóttir, Guðrún Lilja Gunnlaugsdóttir, Tinna Gunnarsdóttir, Dögg Guðmundsdóttir, Vík Prjónsdóttir, Hrafnkell Birgisson, Brynhildur Pálsdóttir, Snæfríð Þorsteins, Hildigunnur Gunnarsdóttir, Sruli Recht, Tuesday Project, Auður Ösp Guðmundsdóttir, Embla Vigfúsdóttir, María Kristín Jónsdóttir, Bylgja Rún Svansdóttir, Hafsteinn Júlíusson, Hanna Jónsdóttir, Hanna Dís Whitehead, Garðar Eyjólfsson, Þórunn Árnadóttir, Unnur Valdís Kristjánsdóttir, Róshildur Jónsdóttir, Brynjar Sigurðarson, Ragnheiður Ösp, Sigurður Þorsteinsson, Stefnumót hönnuða og bænda, Norðaustan 10, MAKE by Þorpið, Attikatti
Auk fjölmargra samstarfsmanna þeirra.