Sunnudaginn 31. janúar er lokadagur sýningarinnar 100% ULL.

Af því tilefni ætla Birgir Örn Jónsson sýningarstjóri og Sigríður Sigurjónsdóttir forstöðumaður Hönnunarsafns Íslands að vera með leiðsögn um hana þann sama dag.

Ullarvinnsla hefur löngum verið samofin handverks-og iðnaðarsögu þjóðarinnar og eru nú um 750 tonn af ull nýtt í ullarframleiðslu á hverju ári.

Á sýningunni er hægt að fræðast um sex ólík verkefni íslenskra hönnuða og fyrirtækja þar sem íslenska ullin er nýtt á ýmsa vegu.

Þeir hönnuðir og fyrirtæki sem taka þátt í sýningunni eru:

Kula by Bryndís, Ásthildur Magnúsdóttir vefari, Ró, Kormákur og Skjöldur, Magnea og Ístex.

Á dögunum hélt Garðabær upp á 40 ára afmæli sitt með hátíðlegri dagskrá á Garðatorgi. Af þessu tilefni bauð Hönnunarsafn Íslands valinkunnum Garðbæingum að velja sér safngrip úr varðveislurýmum safnsins til að setja upp á safnmunasýninguna Geymilegir hlutir.

Sjö Garðbæingar mættu á tilsettum tíma og fylgdi starfsfólki safnsins um varðveislurýmin og fékk dálitla innsýn í verkefni starfsfólks. Á afmælisdaginn sjálfan var búið að stilla safngripnum upp ásamt stuttri frásögn sem skýrði af hverju viðkomandi valdi þann grip.

Dómnefnd Hönnunarverðlauna Íslands 2015 hefur lokið störfum. Með því að fara á heimasíðu verðlaunanna má sjá forval dómnefndar til Hönnunarverðlauna Íslands og vísbendingu um handhafa viðurkenningar fyrir bestu fjárfestingu í hönnun. Hönnunarverðlaun Íslands verða veitt 24. nóvember, að loknu málþingi um framleiðslumöguleika á Íslandi.

Við bjóðum upp á glænýja sýningu með völdum munum úr safnkosti safnsins. Á 17. júní er ókeypis aðgangur í safnið og opið frá 12-17. Við hvetjum alla til að nýta daginn og gera sér ferð í safnið og skoða úrvalsmuni úr safneigninni sem varpa ágætu ljósi á þá breidd sem einkennir söfnunarsvið Hönnunarsafnsins. Á sýningunni má skoða módel af byggingu Högnu Sigurðardóttur að Bakkaflöt 1 í Garðabæ, en einnig Appollo stól Gunnars Magnússonar og fatnað íslenskra tískuhönnuða og listamanna. Nokkrir lampar eru til sýnis, meðal annars Heklulampi þeirra Péturs B. Lútherssonar og Jóns Ólafssonar en Heklulampinn var framleiddur í mörg ár í Danmörku og seldur víða. Meirihluti safneignar safnsins eru gjafir og á sýningunni geta gestir lesið sér til gagns og fróðleiks ýmsa texta um það af hverju ákveðnum hlutum er safnað.