Stefán Bogi Stefánsson gullsmiður verður með leiðsögn í Hönnunarsafni Íslands sunnudaginn 25. janúar kl. 15.  sem er jafnframt síðasti sýningardagur PRÝÐI, sýningu sem sett var upp í samstarfi við Félag íslenskra gullsmiða í tilefni 90 ára afmælis félagsins. Á sýningunni er silfur-teketill sem Stefán Bogi smíðaði sérstaklega fyrir sýninguna og mun hann segja frá smíðinni í máli og myndum.

Næstkomandi helgi 24.—25. janúar er síðasta sýningarhelgi  PRÝÐI afmælissýningar Félags íslenskra gullsmiða.

Á sýningunni eru gripir eftir 40 gullsmiði sem voru gefnar frjálsar hendur að smíða fyrir sýninguna eða velja úr eigin safni.  Gullsmiðirnir eru á ólíkum aldri, þeir sem unnið hafa við fagið í áratugi og byggt upp atvinnurekstur og tekið til sín lærlinga, svo og yngra fólk sem sýnir við hlið meistara sinna og hefur á síðustu árum skapað sér nafn og sérstöðu með þátttöku í fjölda sýninga og rekstri vinnustofa eða verslana.

Næstkomandi fimmtudag, þann 20. nóvember kl. 20 mun dr. Hjalti Franzson jarðfræðingur hjá Íslenskum orkurannsóknum flytja fyrirlestur um gull í náttúrunni.

Þar mun hann meðal annars rekja sögu gullleitar á Íslandi og hvað það er í íslenskri náttúru sem leiðir til að gullútfellingar myndast.

Einnig mun hann fjalla um hvaða aðferðum gullleitarmenn beita til að ná sem bestum árangri, hvernig mat á vænlegum svæðum er gert og hvernig gullið er unnið úr berginu.

Er von til þess að íslenskir gullsmiðir geti notað íslenskt gull í framtíðinni?

Kíkið við á fimmtudagskvöldið og fræðist um áhugavert efni!