Við bjóðum upp á hádegisleiðsagnir á föstudögum fram að jólum. Þær hefjast kl. 12:15 og taka hálftíma. Á myndinni er einn góðra gripa úr safneigninni. Kjóll Bjarkar Guðmundsdóttur eftir Hrafnhildi Arnardóttur (Shoplifter). Þær Björk og Hrafnhildur gáfu safninu kjólinn, en Björk notaði hann á einu af tónleikaferðalögum sínum. Fleiri upplýsingar um kjólinn er að sjálfsögðu að finna á sýningunni ,,Geymilegir hlutir."

Verið velkomin! Starfsfólk Hönnunarsafns Íslands.

Sunnudaginn 29. maí lýkur sýningu Hönnunarsafns Íslands á húsgögnum Gunnars Magnússonar húsgagnahönnuðar. Sama dag lýkur sýningu á verkum Hrafnhildar Arnardóttur, Á gráu svæði. Sýningarnar höfða til fjölbreytts hóps unnenda íslenskrar hönnunar og menningarsögu og hafa verið mjög vel sóttar.

Á laugardaginn kl. 15 mun Ásdís Ólafsdóttir sýningarstjóri ganga með Gunnari um sýninguna á verkum hans og gefst gestum því kærkomið tækifæri til að hlusta á ýmsan fróðleik um íslenska húsgagnasögu og feril Gunnars, en hann er einn okkar afkastamesti húsgagna- og innanhússhönnuður. Í framhaldi af leiðsögn Ásdísar mun Harpa Þórsdóttir forstöðumaður Hönnunarsafnsins ganga um sýningu Hrafnhildar Arnardóttur og segja frá verkum hennar en hún hlaut nýverið hin virtu norrænu textílverðlaun sem verða afhent í Svíþjóð síðar á þessu ári.

Verið velkomin!

Barbara Miklič Türk, forsetafrú Slóveníu, heimsótti Hönnunarsafn Íslands í Garðabæ þriðjudaginn 3. maí sl. í fylgd með forsetafrú Íslands Dorrit Moussaieff.  Heimsóknin var liður í dagskrá í opinberri heimsókn forseta Slóveníu og föruneytis dagana 3.-5. maí. 

Harpa Þórsdóttir forstöðumaður Hönnunarsafn Íslands tók á móti gestunum og fylgdi þeim um þær sýningar sem eru nú í Hönnunarsafninu.  Í safninu er yfirlitssýning á verkum Gunnars Magnússonar húsgagnahönnuðar og einnig er í safninu sýningin Á gráu svæði með verk eftir Hrafnhildi Arnardóttur.