Sunnudaginn 21. febrúar kl 14:00 mun Inga S. Ragnarsdóttir, myndlistarmaður og annar af sýningarstjórum sýningarinnar ganga með gestum um sýninguna Deiglumór. Keramik úr íslenskum leir 1930 - 1970.

Sýningin byggir á rannsóknum Ingu á tímabilinu 1930 - 1970 í sögu keramiklistar á Íslandi. Þar má sjá gripi frá fyrstu leirkeraverkstæðum á Íslandi. Þeir frumkvöðlar sem ráku verkstæðin lögðu áherslu á að nýta íslenskan leir í gripina. Verkstæðin sem um ræðir eru: Listvinahúsið, Funi, Laugarnesleir, Lerbrennsla Benedikts Guðmundssonar, Roði / S.A. keramik og Glit.

Samtímis sýningunni kemur út samnefnd bók sem byggir á rannsóknum Ingu. Höfundar bókarinnar eru Inga S. Ragnarsdóttir og Kristín G. Guðnadóttir.

Minningarsjóður Ragnars Kjartanssonar gefur bókina út.
Inga er dóttir Ragnars Kjartanssonar leirlistamanns.

Á dögunum færði Steinunn Marteinsdóttir Hönnunarsafni Íslands veglega gjöf. Um er að ræða nokkurn fjölda leirmuna eftir Steinunni sem voru á yfirlitssýningu safnsins á verkum hennar fyrr á þessu ári. Meðal þeirra verka sem Steinunn gaf safninu eru stórir skúlptúrvasar, Jökulstef og Esjustef sem hún sýndi á fyrstu einkasýningu sinni á Kjarvalsstöðum árið 1975 og marka þáttaskil í íslenskri lista- og hönnunarsögu. Þessi verk eru lykilverk á ferli Steinunnar, þau sýna frumlega afstöðu gagnvart þeirri hefð sem hafði verið ríkjandi í íslenskri leirlist fram að þessum tíma. Með náttúrustefjum sínum mótaði Steinunn íslensk fjöll sem var nýmæli innan leirlistarinnar og vakti mikla athygli. Annar kjörgripur sem Steinunn færði safninu er hár vasi sem var sendur á stóra norræna farandsýningu í Bandaríkjunum árið 1980.

Vorvindar glaðir – Hönnunarsafn Íslands og Garðaskóli

Í tilefni af Listadögum barna verða nemendur í 8.bekk Garðaskóla með sýningu á keramikverkum í Hönnunarsafni Íslands dagana26. apríl - 8. maí.

Verkin eru unnin í samstarfi við Hönnunarsafnið. Nemendur fengu leiðsögn um sýninguna Ísland er svo keramískt, þar sem farið var yfir fjölbreyttan feril Steinunnar Marteinsdóttur leirlistamanns. Eftir heimsóknina unnu þau áfram með hugmyndir í skólanum og sérstök áhersla var lögð á innblástur frá náttúrunni sem var einn helsti áhrifavaldur Steinunnar.

Afrakstur þessarar vinnu verður sýndur í Hönnunarsafni Íslands á meðan á Listadögum barna stendur.

Steinunn Marteinsdóttir mun ganga um sýninguna Ísland er svo keramískt í fylgd Þóru Sigurbjörnsdóttur sérfræðings safnsins síðasta sýningardag þann 28. febrúar kl. 14:00.

Steinunn er einstakur leirlistamaður í íslenskri hönnunar– og listasögu. Hún hefur á 55 ára ferli skapað afar persónulegan stíl með verkum sínum sem hún hefur mótað og unnið með krefjandi hætti. Steinunn hefur aldrei numið staðar í sinni vinnu. Afköstin hafa verið mikil og sköpunarþátturinn oft á tíðum dirfskufullur. Á sunnudag mun hún rifja upp minningar tengdar ferli sínum og segja frá mismunandi tímabilum og þemum sem einkennt hafa verk hennar.

Ísland er svo keramískt er yfirlitssýning á verkum Steinunnar Marteinsdóttur leirlistamanns sem hefur verið ákaflega vel sótt frá því að hún var opnuð snemma í janúar.

Sunnudaginn 14. febrúar kl. 14 verður Harpa Þórsdóttir sýningarstjóri sýningarinnar Ísland er svo keramískt með leiðsögn um sýninguna. Allir eru velkomnir.

Þetta er yfirlitssýning á verkum Steinunnar Marteinsdóttur leirlistamanns sem hefur verið ákaflega vel sótt frá því að hún var opnuð snemma í janúar

Í leiðsögninni ætlar Harpa að fjalla um leirlist Steinunnar í víðu ljósi, en verk hennar á löngum ferli eru afar ólík. Á sýningunni gefst kærkomið tækifæri til að bera saman ólík tímabil Steinunnar og mismunandi áherslur. Harpa mun í leiðsögninni leggja áherslu á að lýsa höfundareinkennum þessa afkastamikla leirlistamanns og skýra sérstöðu Steinunnar í íslenskri hönnunar– og listasögu.

Hönnunarsafn Íslands efnir til yfirlitssýningar á leirlist Steinunnar Marteinsdóttur.

Steinunn er einstakur leirlistamaður í íslenskri hönnunar- og listasögu. Hún hefur á 55 ára ferli skapað afar persónulegan stíl með verkum sínum sem hún hefur mótað og unnið með krefjandi hætti. Á fyrstu einkasýningu sinni árið 1975 markaði Steinunn þau þáttaskil í íslenskri leirlistasögu að sýna íslenskt landslag á afgerandi hátt með stórum og smáum skúlptúrvösum og veggmyndum.  Afköstin hafa verið mikil og sköpunarþátturinn oft á tíðum dirfskufullur. Sé horft yfir feril hennar á þessum tímamótum má líkja honum við endalausa könnunarferð, þar sem öllu því sem má líkja við vanafestu og stöðnun er storkað.

Sýningartímabil er frá 9.janúar – 28. febrúar 2016.

Í Hönnunarsafni Íslands er verið að undirbúa yfirlitssýningu á leirlistaverkum Steinunnar Marteinsdóttur sem býr og starfar að list sinni að Hulduhólum í Mosfellsbæ. Steinunn á afar langan og farsælan feril að baki og hún er fyrir löngu orðin þekkt fyrir einkar glæsilegt og fjölbreytt framlag til íslenskrar leirlistarsögu. Verk Steinunnar má finna víða, svo sem  í opinberum söfnum og í einkasöfnum hér heima og í útlöndum.

Vegna undirbúnings sýningarinnar óskum við eftir því að einstaklingar og fjölskyldur sem eiga leirmuni eftir Steinunni hafi samband við safnið svo hægt verði að skrá til hlítar muni Steinunnar. Auðvelt er að þekkja leirmuni Steinunnar þrátt fyrir að verk hennar séu einstaklega fjölbreytt, en Steinunn merkir yfirleitt alltaf verk sín SM, S Mart eða Steinunn.

Kogga (1952)

vasi, 1991

Vasinn hennar Koggu er grófgerður í formi og skreytingu, það má segja að hans sé tröllslegur!

Í þjóðsögum tengjast tröll fjöllum og grjóti. Þau verða að steini þegar sólin skín á þau líkt og mjúkur leirinn verður að hörðu efni við mikinn hita í ofni.

Grýla og hennar fjölskylda eru tröll sem koma til byggða um jólin, ef til vill hætta þau sér nálægt mönnunum á þessum tíma þar sem að sólin skín svo sjaldan?